Studerer du rettsvitskap og ønskjer erfaring med opplærings- og forvaltningslova? Statsforvaltaren i Møre og Romsdal har ledig sommarvikarat i 6 – 8 veker. Oppstart frå 2. juni.
Vi er på utkik etter deg som har interesse for samfunnsliv og vil jobbe for å betre barn- og unge sine oppvekstvilkår.
Ønsker du innsikt i forvaltning av sentrale individuelle rettar i det norske utdanningssystemet?
Utdanningsseksjonen hos Statsforvaltaren i Møre og Romsdal tilbyr relevante, lærerike og utfordrande arbeidsoppgåver.
Vi har behov for sommarvikarar for å jobbe med klagebehandling og informasjon og rettleiing til skolar, kommunar, fylkeskommunen og brukarar.
Stillingane er plassert i seksjon utdanning i verksemdsområdet sosial berekraft. Seksjon utdanning inkluderer fagfelta barnehage, grunnskole, vidaregåande opplæring, vaksenopplæring og integrering.
Arbeidsoppgåver
Du vil samarbeide med erfarne rådgivarar som i hovudsak arbeider med klagebehandling av sluttvurderingar i grunnskolen og vidaregåande opplæring. Du vil få grundig opplæring og sjølvstendige arbeidsoppgåver. Det vil vere aktuelt å ha felles opplæring nokre dagar i løpet av mai/byrjinga av juni.
Vi ser etter deg som
• studerer rettsvitskap – har bachelorgrad, ev. er student på 3. året i bachelorutdanninga eller er masterstudent
• har god skriftleg og munnleg framstillingsevne på norsk
• har gode samarbeidsevne
• trivst med eit høgt tempo
Hos oss får du
- fleksibel arbeidstid med normalarbeidstid mellom klokka 08:00 og 15:30
- kontorplass på Fylkeshuset i Molde
- løn som konsulent med lønsinnplassering avhengig av kompetanse, erfaring og tal på studieår
Les meir om godane ved å jobbe i staten på Arbeidsgiverportalen (https://arbeidsgiver.dfo.no/lonn-goder-og-reise)
Vi bruker som hovudregel nynorsk som skriftspråk. Du må beherske norsk både skriftleg og munnleg.
Mangfald
Eit godt arbeidsmiljø er prega av mangfald. Vi ønskjer medarbeidarar med ulike kompetansar, fagkombinasjonar, livserfaring og perspektiv for å bidra til ei enda betre oppgåveløysing. Vi oppfordrar difor alle kvalifiserte kandidatar til å søkje utan omsyn til alder, kjønn, funksjonsevne eller etnisk bakgrunn. Du er også velkomen til å søkje sjølv om du ikkje kan vise til ein samanhengande yrkeskarriere. Vi legg til rette for medarbeidarar som har behov for det.
Har du ei funksjonsnedsetting, hol i CV-en eller innvandrarbakgrunn, kan du bli positivt særbehandla om du set kryss for dette når du søkjer stillinga. Du kan lese meir om dette på arbeidsgivarportalen (https://arbeidsgiver.dfo.no/positivsaerbehandling).
Praktisk informasjon om søknadsprosessen
Alle som søkjer stillinga må søkje digitalt. Når søknadsfristen går ut, vurderer vi søknaden din på bakgrunn av informasjonen du har sendt oss. Det er difor viktig at du både i søknadsbrevet og CV-en, viser korleis kompetansen din fyller krava som er satt i utlysinga.
Det er viktig at du registrere all relevant utdanning og erfaring i profilen du opprettar i rekrutteringssystemet (sjølv om du legg ved ein ferdigutfylt CV). Dette er mellom anna nødvendig for å ivareta kravet om fullstendig søkjarliste.
Relevante vitnemål og attester lastar du opp. Vitnemål og/eller karakterutskrifter henter du frå vitnemålsportalen. Om noko av utdanninga di er frå utlandet, legg du ved godkjenning frå NOKUT/Direktoratet for høyere utdanning og kompetanse. Vedlegg lastar du opp i PDF-format.
Offentleg søkjarliste blir utarbeidd etter søknadsfristens utløp. Om du ønskjer å reservere deg frå den offentlege søkjarlista, må du grunngje dette særskilt. For at vi skal kunne vurdere ønskjet ditt om reservasjon, må du grunngje konkret kva for ulempe det vil ha for deg å stå på den offentlege søkjarlista. Du vil bli varsla om ønsket ditt ikkje vert tatt til følgje. Vi gjer merksam på at søkjarlista kan bli offentleg sjølv om du som søkjar ber om anonymitet jf. offentleglova § 25.
Om oss
Statsforvaltaren er Kongen og Regjeringa sin fremste representant i fylket. Vi har ansvaret for å informere om statleg politikk og sette handlingsplanar ut i livet. Oppgåvene er i hovudsak rettleiing, tilsyn og klagebehandling retta mot enkeltpersonar, kommunar og bedrifter. Dette gjeld innan kommuneøkonomi og forvaltning, sosial- og familierettslege saker, samfunnstryggleik og beredskap, helse, utdanning, landbruk og miljøvern. Vi er ein kompetansearbeidsplass med om lag 150 medarbeidarar som jobbar for visjonen vår «Trygg framtid for folk og natur».
Har du spørsmål om stillinga? Ta gjerne kontakt med rekrutterande leiar Maren Ingeborg Ørjasæter på telefon (Norge +47) 90041063 eller områdedirektør Tone Monsen Aarø på telefon (Norge +47) 90701979.
Søknadsfrist: 27. april 2025